𑢾𑢳𑢡𑢫𑢩𑢶𑢷𑢣 𑢩𑢺𑢨𑢥𑢡

𑢶𑣈𑣓𑣈 𑣅𑣌𑣉 𑣉𑣌𑣉𑣓 𑣙𑣃𑣔𑣁 𑣜𑣈 𑣁𑣘𑣓𑣄 𑣙𑣅𑣁𑣖, 𑣚𑣂𑣘𑣂, 𑢾𑣓𑣁𑣋𑣉𑣖, 𑢴𑣉𑣝𑣕𑣃𑣜, 𑢹𑣂𑣕𑣁𑣙𑣁𑣞𑣁 𑣗𑣓𑣉𑣄𑣁, 𑣈𑣓 𑣙𑣃𑣔𑣁𑣄𑣉 𑣘𑣉𑣒𑣉𑣖 𑣌𑣃𑣗𑣂 𑣗𑣂𑣕𑣜 𑣜𑣈𑣓 𑣏𑣂𑣔𑣃 𑣗𑣜𑣁𑣗𑣜𑣂. 𑢬𑣎𑣂𑣆 𑣕𑣈𑣅𑣄𑣔𑣉 𑣓𑣈𑣓𑣁 𑣕𑣓𑣁 𑣏𑣂, 𑣈𑣓 𑣙𑣃𑣔𑣁𑣔𑣉 𑣌𑣁 𑣏𑣑𑣚𑣉𑣖𑣓 𑣇𑣜𑣂𑣄 𑣗𑣜𑣁𑣗𑣜𑣂 𑣖𑣈𑣓𑣄. 𑢵𑣂𑣞𑣂𑣊 𑣙𑣉𑣉 𑣙𑣃𑣔𑣁 𑣜𑣈 𑣞𑣓𑣁𑣋𑣉𑣖 𑣉𑣚𑣈 𑣕𑣈𑣅𑣄 𑣈𑣞𑣃 𑣋𑣉𑣜𑣉𑣎 𑣙𑣉𑣗𑣁𑣓 𑣕𑣓𑣁. 𑢡𑣗𑣃𑣁𑣄 𑣞𑣗𑣂𑣓 𑣋𑣂𑣓𑣂𑣝𑣌𑣉 𑣖𑣈𑣓𑣄 𑣖𑣈𑣓𑣔𑣉 𑣓𑣈𑣚𑣉𑣄 𑣜𑣃𑣃𑣘 𑣜𑣈 𑣗𑣓𑣉𑣄 𑣅𑣓𑣁. 𑢩𑣚 𑣁𑣀𑣌𑣁 𑣜𑣈 𑣗𑣓𑣉𑣄 𑣅𑣓𑣁. 𑢡𑣅𑣜 𑣞𑣉𑣖𑣅𑣔𑣉 𑣙𑣉𑣉𑣌𑣉 𑣜𑣈 𑣌𑣉𑣖 𑣋𑣈𑣗𑣃 𑣝𑣈𑣅𑣁𑣀 𑣚𑣈𑣓𑣁. 𑢳𑣙𑣄𑣔𑣉 𑣈𑣞𑣃 𑣘𑣃𑣜𑣄 𑣕𑣈 𑣙𑣉𑣉𑣌𑣉𑣗𑣃 𑣉𑣚-𑣘𑣛𑣁𑣉 𑣝𑣈𑣅𑣁𑣀 𑣅𑣓𑣁. 𑢵𑣂𑣞𑣂𑣊 𑣁𑣗𑣃𑣁𑣄 𑢵 𑣋𑣃𑣜𑣃 𑣌𑣉𑣚 𑢺𑣌𑣉 𑢷𑣉𑣔𑣜𑣁 𑣕𑣈𑣌𑣂𑣍 𑣙𑣂𑣑-𑣓𑣖 𑣚𑣈𑣑 ‘𑢹𑣗𑣁𑣜𑣊 𑢯𑣂𑣕𑣂’ 𑣚𑣂𑣘𑣂 𑣕𑣈𑣌𑣉 𑣉𑣚-𑣘𑣛𑣁𑣉 𑣝𑣈𑣅𑣁𑣀 𑣅𑣓𑣁. 𑢾𑣓𑣁𑣖𑣌𑣉 𑣕𑣄 𑣜𑣈 𑣚𑣂𑣘𑣂 𑣕𑣉 𑣉𑣚-𑣘𑣛𑣁𑣉 𑣝𑣈𑣅𑣁𑣀 𑣙𑣉𑣗𑣁 𑣅𑣓𑣁. 𑢲𑣁𑣒𑣁 𑢾𑣒𑣂𑣆𑣚 𑣘𑣙 𑣅𑣕𑣈𑣄 ‘𑢹𑣗𑣁𑣜𑣊 𑢯𑣂𑣕𑣈’ 𑣕𑣃𑣜𑣕𑣃𑣊 𑣈𑣒𑣈𑣄 𑣅𑣌𑣁𑣓𑣁. 𑢨𑣓 𑣕𑣃𑣜𑣕𑣃𑣊 𑣞𑣗𑣂𑣓 𑣖𑣉𑣀𑣑𑣉 𑣜𑣈 𑣉𑣚-𑣘𑣛𑣁𑣉 𑣓𑣙𑣄 𑣎𑣌𑣈𑣑 𑣙𑣉𑣗𑣁𑣓 𑣕𑣓𑣁. 𑢨𑣓 𑣖𑣉𑣀𑣑𑣉’𑣌𑣉 𑣜𑣈 𑣈𑣞𑣃 𑣘𑣃𑣜𑣄 𑣕𑣈 𑣗𑣁𑣗𑣃-𑣖𑣁𑣆 𑣕𑣈𑣌𑣉 𑣁𑣘𑣓𑣄 𑣚𑣂𑣘𑣂 𑣕𑣈𑣌𑣉 𑣝𑣈𑣅𑣁𑣀 𑣅𑣓𑣁. 𑢨𑣓𑣁𑣖𑣈𑣓𑣕𑣈 𑣁𑣗𑣃𑣁𑣄 𑢹𑣗𑣁𑣜𑣊 𑢯𑣂𑣕𑣂 𑣚𑣂𑣘𑣂 𑣕𑣈 𑣋𑣈 𑣞𑣓𑣁𑣋𑣉𑣖𑣗𑣃 𑣉𑣚𑣈 𑣏𑣁. 𑢶𑣃𑣕𑣂𑣑 𑣙𑣉𑣉𑣌𑣉 𑣖𑣂-𑣘𑣂𑣅𑣑 𑣌𑣕𑣙𑣁, 𑣌𑣗𑣉𑣅, 𑣔𑣃𑣜𑣀, 𑣏𑣚𑣁𑣌𑣂 𑣎𑣋𑣜𑣌𑣉𑣗𑣃 𑣉𑣚𑣈 𑣜𑣈𑣔𑣉 𑣈𑣞𑣃 𑣘𑣃𑣜𑣄 𑣕𑣈 𑣘𑣃𑣕𑣂𑣌𑣉 𑣞𑣋𑣉𑣖 𑣔𑣆𑣅𑣉𑣄𑣁. 𑢳𑣈𑣓 𑢵 𑣋𑣃𑣖𑣂 𑣜𑣈 𑣓𑣂𑣖𑣂𑣓 𑣘𑣃𑣜𑣄 𑣕𑣈 𑣔𑣂𑣜𑣂, 𑣔𑣁𑣜𑣃, 𑣉𑣅-𑣏𑣂𑣐𑣈, 𑣎𑣂𑣇-𑣎𑣃𑣓𑣕𑣃𑣌𑣉 𑣖𑣈𑣓𑣄𑣌𑣉𑣁. 𑢨𑣓𑣌𑣉𑣁𑣄 𑣙𑣂𑣅𑣁𑣕𑣂𑣊 𑣜𑣈𑣗𑣃 𑣚𑣉 𑣔𑣆𑣅𑣁𑣄. 𑢶𑣜, 𑣈𑣚𑣁 𑢹𑣉𑣉 𑣙𑣃𑣔𑣁 𑣜𑣈𑣓 𑣙𑣁𑣋𑣁𑣌𑣉, 𑣘𑣆𑣌𑣂-𑣘𑣉𑣜𑣎𑣁𑣌𑣉, 𑣖𑣐𑣁𑣌𑣂-𑣖𑣃𑣐𑣑𑣁𑣌𑣉, 𑣘𑣛𑣁𑣉 𑣕𑣓 𑣖𑣁𑣆-𑣗𑣃𑣆𑣌𑣉, 𑣗𑣁𑣗𑣃-𑣗𑣉𑣅𑣉𑣌𑣉 𑣁𑣗𑣃𑣁𑣄 𑣞𑣓𑣁𑣋𑣉𑣖 𑣘𑣃𑣜𑣄-𑣕𑣈-𑣘𑣃𑣜𑣄𑣗𑣃 𑣉𑣚𑣈 𑣏𑣁. 𑢩𑣚 𑢬𑣈𑣓𑣂𑣄, 𑢳𑣂𑣕𑣂𑣖𑣁 𑢮𑣊𑣌𑣉. 𑢹𑣕𑣃 - 𑢯𑣌𑣙